Posts
owls talk by lilia73
Umiyak ka hindi dahil mahina ka.
Sumigaw ka hindi dahil galit ka.
Huminga ka ng malalim at hayaan mong sa saglit na panahon, maranasan mo ang sarap ng buhay.
Humiga ka at ilapat mo ang katawan mo sa kama.
Mamahinga ka muna at hayaan mo muna sila.
Pahingi naman ako ng konting oras?
Oras para maranasan kong isa ulit akong bata.
Musmos na walang iniisip kundi ang maglaro, kumaen at matulog.
Para hindi na kailangan tipirin ang hininga.
Magbabaka-sakaling sa pagiyak ko, may magpupunas ng luha ko.
May makikinig sa mga sigaw ko.
May magliligtas sa mga hiningang bibitiwan ko.
May maglalatag sa hihigaan ko.
May lugar para silungan at pahingahan ko.
Pahingi ng konting panahon?
Panahon para magawa ang mga bagay na gusto ko.
Mga bagay na hindi kamusmusan ang maghahatid sa’kin.
Gusto kong umiyak, pero natatakot akong baka punasan mo ang luha ko.
Gusto kong sumigaw, pero natatakot akong baka marinig mo ako at patahimikin ako.
Gusto kong huminga ng malalim, kaso baka hindi mo ko sagipin sakaling iyon na ang huli.
Gusto kong humiga pero pa’no ka?
Ayaw kitang iwan.
Gusto kong magpahinga pero pa’no ka?
Hindi na kita mababantayan.
Iyak.
Umiyak ka dahil naghihina ka na.
Sigaw!
Sumigaw ka dahil galit ka na.
Magbuntong-hininga.
Huminga ka ng malalim dahil sumisikip na.
Higa.
Humiga ka dahil pagod ka na.
Magpahinga.
No comments:
Post a Comment