Ikinawit ang kamay sa hangin at itinikwas ang hintuturo.
Lumakad.
Humakbang paakyat.
Umupo.

Nakita kita at napangiti ako.

Bagay sa'yo ang mata mong kumikinang.
Nakikita mo ba ko?
Sana..
Saan ka tumutingin?
Wag dyan!
Tinitingnan pa kita.

Bagay sa'yo ang ilong mong kumukulubot 'pag ika'y sumisimangot.
Naaamoy mo ba ang pabango ko?
Sana..
Sana kahit katiting na pansin, inilaan mo sa'kin.
Para hindi ko na ulit kailangang buksan ang bag ko, at magpabango ulit.

Bagay sa'yo ang mapang-akit mong ngiti.
Para sa'kin ba ang mga ngiting iyan?
Sana..
Para kahit naman kaunti, ay mapangiti din ako.

Bagay sa'yo ang maamo mong mukha.
Na inaksesoryahan ng kumikinang na mata,
Matangos na ilong,
At mapang-akit mong ngiti.

Pero may mali.
Sino ang katabi mo?
Siya lang ang hindi bagay sa'yo..
Ang babaeng inaalayan mo ng ngiti at tingin mo.

Masyado kong nahumaling sa'yo.
Ah! "Para po."
Hindi ka kasama sa byahe ng buhay ko.